امریکی صدر کی ایران کو غیر مشروط سرنڈر کی دھمکی اور آیت اللہ خمنائی کو ملفوف الفاظ میں قتل کی دھمکی "ہمیں پتہ ہے وہ کہاں ہیں" اضطرابی کیفیت ہے ۔لے پالک اسرائیل کو اپنی زندگی میں پہلی مرتبہ خوفناک میزائل حملوں کا سامنا ہے ۔چھ روز سے قیمتی خون والے اسرائیلی پناہ گاہوں میں چھپے بیٹھے ہیں۔ عمارتیں غزہ کی طرح تباہ ہو رہی ہیں ۔امریکی صدر نے دھمکی تو دے دی ہے لیکن اس پر عملدرآمد ایک بڑا فیصلہ ہے جسکی بہت بڑی قیمت ہے ۔
بنکر بسٹر بم عراق اور افغانستان میں گرائے جا چکے ہیں ۔تمام نیٹو ممالک کی مدد سے عراق اور افغانستان پر خوفناک بمباری بھی ہو چکی ہے ۔ایران پر اسی طرز کا حملہ اور بمباری ممکن تو ہے لیکن اس کی ایک قیمت ہے ۔یہ قیمت تیسری عالمی جنگ ہے ۔
پلوں کے نیچے سے بہت پانی بہہ گیا ہے ۔وہ حالات موجود ہی نہیں جب پوری دنیا نے اقوام متحدہ میں امریکہ اور نیٹو ممالک کو عراق اور افغانستان پر حملہ کا مینڈیٹ دیا تھا ۔
ایک یا دو حملوں میں ایران کو شکست نہیں دی جا سکتی ۔عراق اور افغانستان پر قابو پاتے مہینے گزر گئے تھے یہ تو ایران ہے جیسے چین ،روس اور پاکستان کی مدد حاصل ہے ۔
پہلے اسرائیل کو میزائل حملوں کا سامنا نہیں تھا اب لے پالک کو ہر روز میزائلوں سے نشانہ بنایا جا رہا ہے ۔ایران پر امریکی حملہ ایک دلدل ہے ۔یہ غلطی کر لی صاحب بہادر پھنس جائیں گے اور کسی کے پاس وہ رسی یا لاٹھی موجود نہیں جو دلدل سے نکال سکے ۔
ویت نام میں امریکیوں کو پتہ تھا روسی اور چینی ویتنامیوں کی مدد کر رہے ہیں ۔افغانستان میں امریکیوں کو پتہ تھا پاکستانی گڈ اور بیڈ طالبعلم کھیل کر انہیں دھوکہ دے رہے ہیں ۔ایران پر حملہ کیا تو چینی جو کریں گے اسکی ایک جھلک آج چینی صدر کے بیان سے نظر آگئی ہے ۔
ابھی تو دو دن ہوئے ہیں جب اسرائیلی دفاعی نظام کو دو دفعہ مفلوج کیا گیا ہے ۔ہائی ٹیک مصنوعی سیارے شائد چینیوں کے پاس زیادہ اچھے اور کوالٹی کے ہیں جو آئرن ڈوم کا راستہ بدل سکتے ہیں ۔اس وقت بھی اسرائیلی دارالحکومت پر میزائل برس رہے ہیں دفاعی نظام سائبر اٹیک کی زد میں ہے اور ایرانی میزائل ٹھاہ ٹھاہ کر کے گر رہے ہیں ۔
امریکی حملہ شروع ہوتے ہی ایرانی آبنائے ہرمز بند کر دیں گے صرف اسے کھولنے میں ہفتہ لگ جائے گا ۔اس ہفتے کے دوران کیا کچھ ہو گا کوئی نہیں جانتا ۔
ایک لمحہ کیلئے فرض کرتے ہیں ایران کے روحانی پیشوا کو مار دیا گیا ہے ۔سابق شاہ ایران کے بیٹے نے حکومت سنبھال لی ہے لیکن اسے حکومت کرنے کون دے گا ۔یہاں تک پہنچنے میں کتنے دن لگیں گے کسی کو نہیں پتہ ۔چین کبھی اجازت نہیں دے گا گوادر بندر گاہ کے قریب امریکی اپنی کسی کٹھ پتلی کے زریعے آکر بیٹھ جائیں ۔
پاکستان کبھی نہیں چاہے گا اس کے ایک طرف بھارت،ایک طرف امریکی کٹھ پتلی اور ایک طرف ناقابل اعتبار افغان گھیر لیں صرف سمندر کا راستہ بچے ۔
ایران ایک دلدل ہے ۔امریکی اس میں پھنس جائیں گے ۔امریکی معیشت پہلے ہی دیوالیہ ہے ۔ایران پر حملہ سپر پاور کی کہانی ختم ہونے کی رفتار تیز کر دے گا ۔
ہم سمجھتے ہیں ایران پر اسرائیلی حملہ امریکی کھیل ختم ہونے کا آغاز ہے ۔حملہ میں امریکی شامل ہوئے تو کھیل وقت سے پہلے ختم ہو جائے گا ۔
واپس کریں