دل بعض و حسد سے رنجور نہ کر
یہ نور خدا ہے اس سے بے نور نہ کر
لاہور(نامہ نگار) لاہور بار ایسوسی ایشن اور کشمیرسنٹرلاہور کے زیراہتمام یوم یکجہتی کشمیر کے سلسلے میں سیمینار کا انعقاد بار روم میں کیا گیا۔ سیمینار سے امیرجماعت اسلامی لاہور ضیا الدین انصاری، صدر لاہور بار عرفان حیات باجوہ،انچارج کشمیرسنٹرلاہور انعام الحسن کاشمیری، جنرل سیکرٹری لاہور فہد نثار کھوکھر،وکلاء رہنما منظور حسین گیلانی ایڈووکیٹ، الطاف گجر ایڈووکیٹ، عطاء اللہ اصلاحی ایڈووکیٹ ودیگر نے خطاب کیا۔ مقررین نے سیمینار سے خطاب کرتے ہوئے کہا کہ کشمیری پاکستانیوں کے دلوں میں بستے ہیں۔ ہم ایک جسم کی مانند ہیں۔ ہمیں کوئی جدا نہیں کرسکتا۔ کشمیر آزادہوکر پاکستان کا حصہ بنے گا۔ یوم یکجہتی کشمیر منانے کا مقصد کشمیریوں کو اپنی حمایت، تعاون اور مدد کا یقین دلا نا ہے۔ کشمیرکامسئلہ کشمیر ی عوام کی امنگوں اور خواہشوں کے مطابق حل ہونا چاہیے۔ مقررین نے مزید کہا کہ ہم یہاں صرف ایک پروگرام کے لیے جمع نہیں ہوئے،ہم آج ضمیر کی نمائندگی، قانون کی گواہی اور انصاف کے وعدے کے ساتھ کھڑے ہیں۔یومِ یکجہتی کشمیر ایک دن نہیں یہ ایک مسلسل مؤقف ہے،ایک اسٹریٹجک اسٹینڈ،اور ایک اخلاقی کمٹمنٹ ہے۔ وکلاء برادری نے ہمیشہ تاریخ کے مشکل موڑ پرقلم، قانون اور کردار کے ساتھ حق کا ساتھ دیا ہے۔کشمیر کی آزادی محض ایک سیاسی نعرہ نہیں،یہ بین الاقوامی قانون، انسانی حقوق اور اقوامِ متحدہ کی قراردادوں کا کھلا مقدمہ ہے۔لاہور بار ایسوسی ایشن اور جموں و کشمیر لبریشن سیل واضح اور دو ٹوک مؤقف رکھتے ہیں۔ کشمیر کے عوام کو ان کا حقِ خودارادیت ملنا چاہیے۔یہ کوئی رعایت نہیں، یہ ان کا حق ہے۔آج کی یہ تقریب یکجہتی کو علامت سے نکال کرعمل، آواز اور وکالت میں بدلنے کی ایک کوشش ہے۔اپنے بڑے واضح موقف کے ساتھ ہیں کہ یہ پاکستان اور ہندوستان کے درمیان ایک دیرینہ تنازع ہے اور اس کے حل کے لیے اقوام متحدہ میں بھی یہ قرارداد پاس ہوئی کہ کشمیری عوام یہ فیصلہ کریں گے کہ وہ پاکستان کے ساتھ جانا چاہتے ہیں یا وہ جس صورتحال میں ہیں اس میں لینا چاہتے ہیں یا بھارت کے ساتھ۔ کشمیری عوام نے شب و روز کی جدوجہد سے لازوال قربانیاں پیش کرتے ہوئے بتا دیا کہ وہ پاکستان کے ساتھ ہیں وہ پاکستان کے ساتھ جانا چاہتے ہیں اور پاکستان کے ساتھ ان کی وابستگی لا الہ الا اللہ محمد رسول اللہ صلی اللہ علیہ وسلم کی بنیاد کے اوپر ہے۔یقینا مسلمان ایک جسم کی مانند ہے اور اگر تکلیف کشمیری مسلمان کو پہنچتی ہے تو وہ تکلیف یہاں پہ پاکستان میں بیٹھا ہر اہل ایمان مسلمان اس کو محسوس کرتا ہے۔آج بھی اگر پانچ فروری کو یہ دن منایا جاتا ہے تو یہ ایک وعدہ ہے کہ ہم پاکستانی عوام جس شعبہ زندگی سے تعلق رکھتے ہیں وہ اس بات کے اوپر بالکل کلیئر ہے کہ کشمیر پاکستان کا حصہ ہے کشمیر بنے گا پاکستان۔بھارت نے اپنے آئین میں غیرقانونی ترمیم کی اور کشمیر کی خصوصی حیثیت کو ختم کیا۔ اس کے بعد آج تک اقوام متحدہ کی وہ قراردادیں جس کی بنیاد کے اوپر پاکستان میں اپنے ہر سفارتی محاذ کے اوپر اس کو اٹھایا اور کوشش کی اور جس کی کوشش یقینا جاری ہے۔کشمیر کے تنازع کا حل اقوام متحدہ کے پیش کردہ قراردادوں کی روشنی میں کشمیری عوام کی منگوں کے مطابق حل ہونا چاہیے اور بھارت کا یہ جو ناجائز قبضہ ہے اس کو جتنی جلدی ہو سکے اس کو ختم ہونا چاہیے۔ اس موقع پر متعدد قراردادیں بھی منظور کی گئیں۔