دل بعض و حسد سے رنجور نہ کر
یہ نور خدا ہے اس سے بے نور نہ کر
جب آپ حق پر ہوں تو قانونی اور عدالتی معاملات میں کامیابی بڑی بات ہوتی ہے اور جب یہ کامیابی ایک ایماندار، محنتی اور قابل وکیل کی بدولت ملے تو اس کی اہمیت اور بھی بڑھ جاتی ہے۔ میرا مقدمہ، وراثتی جائیداد کی تقسیم سے متعلق تھا اور حریف میرا بھائی تھا جو خود بھی وکیل ہے۔ الحمد اللہ اسلام آباد سول کورٹ سے میرے حق میں میرے کیس کی ڈگری ایک سال اور پانچ ماہ کے قلیل عرصہ میں جاری کر دی گئی ہے۔ ایک پیچیدہ قانونی جنگ تھی، جسے میرے وکیل محترم خلیق الرحمان سیفی ایڈووکیٹ صاحب نے محنت، پیشہ ورانہ مہارت اور زاتی دلچسپی کی بدولت جیتا۔ مقدمہ میں حقائق اور ثبوتوں کو پیش کرنے کے ساتھ ساتھ قانونی نکات پر گہری مہارت اور حکمتِ عملی کی ضرورت تھی جسے محترم خلیق الرحمان سیفی ایڈووکیٹ صاحب نے اپنی ذاتی ذمہ داری سمجھا۔ ان کی اولین ترجیح یہ تھی کہ وہ میرے کیس کے ہر پہلو کو سمجھیں، چاہے وہ کتنا ہی معمولی کیوں نہ ہو۔ انہوں نے ہر دستاویز، گواہ اور ہر ممکنہ زاویے کا بغور جائزہ لیا۔ان کی سب سے بڑی خوبی ان کی تیاری اور یہی پیشہ ورانہ رویہ تھا۔ وہ عدالت میں ہر سماعت کے لیے مکمل تیاری کے ساتھ آتے رہے اور دلائل کو نہ صرف منطقی بلکہ اثر انگیز انداز میں اپنی عدالتی بحث میں حقائق اور قانون کے امتزاج کے ساتھ پیش کیا کہ مخالف وکیل کے لیے ان کا مقابلہ کرنا مشکل ہوگیا۔ انہوں نے مجھے ہر مرحلے پر کیس کی پیشرفت سے آگاہ رکھا اور کیس کی بابت کھل کر بات کی۔ اس سے مجھے ان پر مکمل اعتماد ہوا کہ وہ نہ صرف میرا مقدمہ لڑ رہے ہیں بلکہ میری بہتری کے لیے بھی سوچ رہے ہیں۔ میرے وکیل محترم خلیق الرحمان سیفی صاحب نے کبھی غیر حقیقی توقعات سے مجھے گمراہ نہیں کیا، بلکہ ہر وقت حقائق پر مبنی مشورے دیے۔ انہوں نے نہ صرف مخالف فریق(جو خود وکیل اور بار ایسو سی ایشن کا ممبر بھی تھا) کے دلائل کا بھرپور مقابلہ کیا بلکہ اس کے کمزور نکات کو بھی قانونی مہارت سے اجاگر کیا۔