دل بعض و حسد سے رنجور نہ کر
یہ نور خدا ہے اس سے بے نور نہ کر
لاہور (نمائندہ خصوصی ) کشمیر سنٹر لاہور (جموں وکشمیرلبریشن سیل)کے زیراہتمام عظیم کشمیری دینی و سیاسی رہنما، تحریک آزادی کشمیر کے ممتاز قائد سابق صدر آزادکشمیرمیر واعظ مولوی محمد یوسف شاہ کی برسی کے موقع پر ایک پُروقار دعائیہ تقریب کا انعقاد مسجدبھاگ علی شاہ میں کیا گیا۔ تقریب میں مختلف سیاسی، سماجی، مذہبی اور ادبی حلقوں سے تعلق رکھنے والی شخصیات، دانشوروں، طلبہ اور کشمیری کمیونٹی کے افراد نے بڑی تعداد میں شرکت کی اور مرحوم کی تحریک آزادی کشمیر، دینی خدمات اور ملی جدوجہد کو زبردست خراج عقیدت پیش کیا۔تقریب سے ممتاز عالم دین سابق رکن قانون سازاسمبلی و اسلامی نظریاتی کونسل مولانا شفیع جوش، رہنما پی ٹی آئی فاروق آزاد، رہنما کشمیری کمیونٹی علامہ مشتاق قادری،مسلم لیگ ن کے رہنما عاطف میر اور انچارج کشمیرسنٹرلاہور انعام الحسن کاشمیری نے خطاب کیا۔ تقریب سے خطاب کرتے ہوئے مقررین نے کہا کہ میر واعظ مولوی محمد یوسف شاہ برصغیر کے ممتاز دینی رہنما، مدبر سیاستدان اور کشمیری عوام کے سچے ترجمان تھے جنہوں نے اپنی پوری زندگی کشمیری عوام کے سیاسی، دینی اور سماجی حقوق کے تحفظ کے لیے وقف کر دی۔ انہوں نے کہا کہ مرحوم نے نہ صرف کشمیری عوام کی سیاسی رہنمائی کی بلکہ علمی و دینی میدان میں بھی گراں قدر خدمات سرانجام دیں اور نوجوان نسل میں آزادی، خودداری اور دینی شعور کو بیدار کیا۔مقررین نے کہا کہ میر واعظ مولوی محمد یوسف شاہ تحریک آزادی کشمیر کی تاریخ کا ایک درخشاں باب ہیں۔ انہوں نے مشکل حالات اور شدید دباؤ کے باوجود ہمیشہ حق اور انصاف کی آواز بلند کی اور کشمیری عوام کے حق خودارادیت کے لیے جرات و استقامت کے ساتھ جدوجہد جاری رکھی۔ ان کی قیادت، بصیرت اور قربانیاں آج بھی کشمیری عوام کے لیے مشعل راہ ہیں۔مقررین نے مزید کہا کہ آج جب مقبوضہ کشمیر میں بھارتی قابض افواج کی جانب سے انسانی حقوق کی سنگین خلاف ورزیاں جاری ہیں، کشمیری عوام بدستور اپنے بنیادی حق یعنی حق خودارادیت کے حصول کے لیے جدوجہد کر رہے ہیں۔ مقررین نے کہا کہ کشمیری عوام کی یہ جدوجہد دراصل ان عظیم رہنماؤں کی قربانیوں اور جدوجہد کا تسلسل ہے جنہوں نے آزادی کے خواب کو زندہ رکھا۔مقررین نے اس عزم کا اظہار کیا کہ کشمیری عوام کی جائز اور منصفانہ جدوجہد کو عالمی سطح پر اجاگر کرنے کے لیے ہر ممکن کوشش جاری رکھی جائے گی اور کشمیریوں کے حق خودارادیت کی بھرپور حمایت جاری رکھی جائے گی۔ انہوں نے کہا کہ تاریخ گواہ ہے کہ ظلم اور جبر کے نظام زیادہ دیر قائم نہیں رہتے اور بالآخر حق و انصاف کی فتح ہوتی ہے۔تقریب کے اختتام پر مرحوم میر واعظ مولوی محمد یوسف شاہ کی مغفرت، درجات کی بلندی، پاکستان کی سلامتی اور مقبوضہ کشمیر کی جلد آزادی کے لیے خصوصی دعا کی گئی۔