34 سرکاری جامعات میں سے 26 خسارے کا شکار، 18 ارب روپے کی وفاقی امداد کا مطالبہ، مگر اصل سوال صرف مالی وسائل کی فراہمی نہیں بلکہ تعلیمی اداروں کی مالی خودمختاری، انتظامی جوابدہی اور مستقبل کا تحفظ بھی ہے۔
کسی معاشرے کی ترقی کا اندازہ صرف اس کی سڑکوں، پلوں، عمارتوں اور معاشی منصوبوں سے نہیں لگایا جا سکتا۔ اس کا اصل معیار یہ ہے کہ وہ اپنی نئی نسل کو کس معیار کی تعلیم فراہم کر رہا ہے، علم و تحقیق کے لیے کتنے وسائل مختص کرتا ہے اور اپنے تعلیمی اداروں کو کس حد تک خودمختار، مستحکم اور فعال رکھ سکتا ہے۔ بدقسمتی سے خیبرپختونخوا میں سرکاری جامعات کی مالی صورت حال اب ایک ایسے بحران کی شکل اختیار کر چکی ہے جس کے اثرات صرف تعلیمی اداروں تک محدود نہیں رہیں گے بلکہ صوبے کے سماجی، معاشی اور علمی مستقبل کو بھی متاثر کر سکتے ہیں۔
خیبرپختونخوا کے محکمہ ہائر ایجوکیشن، آرکائیوز اینڈ لائبریریز کی جانب سے 6 نومبر 2026ء کو ہائر ایجوکیشن کمیشن کو ارسال کردہ خط اور اس کے جواب میں 12 نومبر کو اہچ ای سی کے ایگزیکٹو ڈائریکٹر پروفیسر ڈاکٹر ضیاء الحق کی جانب سے وفاقی وزارتِ تعلیم کو لکھا گیا خط اس بحران کی سنگینی اور اس کے ممکنہ حل کی ایک اہم دستاویزی تصویر پیش کرتے ہیں۔
صوبائی حکومت کے مطابق خیبرپختونخوا کی 34 سرکاری جامعات میں تقریباً دو لاکھ طلبہ زیرتعلیم ہیں، جن میں سے 26 جامعات مالی خسارے کا شکار ہیں۔ ان کا مجموعی جمع شدہ خسارہ 5.6 ارب روپے بتایا گیا ہے۔ یہ اعدادوشمار محض مالیاتی رپورٹ کا حصہ نہیں بلکہ ایک ایسے تعلیمی نظام کی مشکلات کی نشاندہی کرتے ہیں جس کے اخراجات مسلسل بڑھ رہے ہیں، مگر دستیاب وسائل ان ضروریات کا ساتھ نہیں دے پا رہے۔
حکومت کا مؤقف ہے کہ گزشتہ برسوں میں تنخواہوں اور پنشن کے اخراجات میں غیرمعمولی اضافہ ہوا، جبکہ سرکاری گرانٹس اسی تناسب سے نہیں بڑھ سکیں۔ صوبائی خط کے مطابق گزشتہ تین سال میں وفاقی گرانٹ میں 6.3 فیصد کمی آئی، جبکہ اخراجات میں 18 فیصد سے زیادہ اضافہ ہوا۔ گزشتہ پانچ سال میں تنخواہوں اور پنشن کے مجموعی اخراجات میں 120 فیصد سے زیادہ اضافے کا دعویٰ بھی کیا گیا ہے۔ دوسری طرف صوبائی حکومت اپنی مالی معاونت صفر سے بڑھا کر 11.85 ارب روپے تک لے جانے کا ذکر کرتی ہے، لیکن اس کے باوجود مالی خلا برقرار ہے۔
یہاں ایک اہم سوال پیدا ہوتا ہے کہ آخر جامعات کا مالیاتی نظام اس نہج تک کیسے پہنچا؟ کیا یہ صرف وفاقی گرانٹس میں کمی کا نتیجہ ہے یا اس کے پیچھے صوبائی مالی منصوبہ بندی، جامعات کی انتظامی ترجیحات، ملازمین کی تعداد، پنشن کے بڑھتے ہوئے بوجھ اور تعلیمی پالیسیوں کی تبدیلی جیسے عوامل بھی کارفرما ہیں؟ ان سوالات کا جواب تلاش کیے بغیر کسی ایک ادارے یا حکومت کو پورے بحران کا ذمہ دار قرار دینا مناسب نہیں ہوگا۔
صوبائی حکومت کی دستاویز میں بتایا گیا ہے کہ 2024-25ء سے 2026-27ء کے دوران جامعات کے اخراجات 40.8 ارب سے بڑھ کر 54.8 ارب روپے تک پہنچ گئے، جبکہ فی طالب علم گرانٹ 82 ہزار سے کم ہو کر 72 ہزار روپے رہ گئی۔ اسی مدت میں تنخواہوں میں 31 فیصد اضافہ ہوا، جبکہ گرانٹس میں اضافہ صرف 8.5 فیصد بتایا گیا ہے۔ یہ فرق واضح کرتا ہے کہ تعلیمی اداروں کے اخراجات اور ان کے دستیاب وسائل کے درمیان عدم توازن بڑھتا جا رہا ہے۔
اس بحران کی ایک بڑی مثال یونیورسٹی آف پشاور ہے، جس کا خسارہ 2.2 ارب روپے بتایا گیا ہے، جبکہ اس کی طویل مدتی پنشن ذمہ داری 53.6 ارب روپے تک پہنچنے کا دعویٰ کیا گیا ہے۔ ایگریکلچر یونیورسٹی پشاور کو 80 کروڑ روپے کی ضرورت ظاہر کی گئی ہے، جبکہ گومل یونیورسٹی ڈیرہ اسماعیل خان اور عبدالولی خان یونیورسٹی مردان کے لیے بھی تقریباً 70، 70 کروڑ روپے کے مالی خلا کا ذکر ہے۔ مزید یہ کہ صوبائی حکومت کے مطابق پانچ سے چھ جامعات مجموعی خسارے اور پنشن کی ذمہ داریوں کا تقریباً 81 فیصد بوجھ اٹھا رہی ہیں۔ اس سے ظاہر ہوتا ہے کہ مالی بحران پورے تعلیمی نظام میں موجود ہونے کے باوجود اس کا دباؤ چند بڑی جامعات پر زیادہ مرتکز ہے۔
تاہم اس پوری صورت حال کا سب سے تشویش ناک پہلو طلبہ اور ان کے خاندانوں پر منتقل ہونے والا مالی بوجھ ہے۔ صوبائی حکومت کے مطابق جامعات اپنے اخراجات کا تقریباً 59 سے 64 فیصد حصہ اپنے ذرائع سے پورا کرتی ہیں، جن میں طلبہ کی فیسیں بنیادی حیثیت رکھتی ہیں، جبکہ سرکاری گرانٹس کا حصہ تقریباً 36 سے 41 فیصد ہے۔ مزید فیسوں میں اضافہ بظاہر جامعات کے لیے فوری مالی سہولت پیدا کر سکتا ہے، لیکن اس کا نتیجہ یہ ہوگا کہ اعلیٰ تعلیم بتدریج متوسط اور کم آمدن والے خاندانوں کی پہنچ سے باہر ہوتی جائے گی۔
تعلیم کو صرف ایک ایسی خدمت نہیں سمجھنا چاہیے جس کی قیمت ہر سال بڑھا کر اداروں کے اخراجات پورے کیے جاتے رہیں۔ سرکاری جامعات کا بنیادی مقصد معیاری تعلیم کو زیادہ سے زیادہ شہریوں کے لیے قابلِ رسائی بنانا ہے۔ اگر ایک ہونہار طالب علم محض مالی مشکلات کے باعث اعلیٰ تعلیم حاصل نہیں کر سکتا تو یہ صرف اس کے خاندان کا نقصان نہیں بلکہ پورے معاشرے کے انسانی وسائل کا ضیاع ہے۔
اسی پس منظر میں خیبرپختونخوا حکومت نے وفاقی حکومت اور ہائر ایجوکیشن کمیشن سے مجموعی طور پر 18 ارب روپے کی مالی معاونت طلب کی ہے۔ اس رقم کو تین حصوں میں تقسیم کرنے کی تجویز دی گئی ہے۔ چھ ارب روپے جمع شدہ خساروں اور واجبات کی ادائیگی، تین ارب روپے ترقیاتی منصوبوں، وظائف، آئی ٹی اور تعلیمی سہولیات، جبکہ نو ارب روپے جامعات کے مستقل انڈومنٹ فنڈز قائم کرنے کے لیے مختص کرنے کی درخواست کی گئی ہے۔
اس منصوبے کا سب سے قابلِ توجہ حصہ نو ارب روپے کے انڈومنٹ فنڈز ہیں۔ دنیا کی متعدد معروف جامعات اپنے مستقل سرمایہ جاتی فنڈز کے ذریعے آمدن پیدا کرتی ہیں۔ ان فنڈز کا بنیادی سرمایہ محفوظ رکھا جاتا ہے اور اس سے حاصل ہونے والی آمدن وظائف، تحقیق، تعلیمی سہولیات اور ادارے کی ترقی پر خرچ کی جاتی ہے۔ صوبائی حکومت کا تخمینہ ہے کہ اگر نو ارب روپے کے ابتدائی سرمائے پر سالانہ دس فیصد منافع حاصل ہو تو تقریباً 90 کروڑ روپے سالانہ آمدن پیدا ہو سکتی ہے۔
یہ تصور اپنی جگہ اہم ہے کیونکہ اس سے جامعات کو ہر سال سرکاری خزانے یا طلبہ کی فیسوں پر مکمل انحصار کرنے کے بجائے ایک اضافی مستقل ذریعہ آمدن مل سکتا ہے۔ تاہم دس فیصد منافع ایک تخمینہ ہے، کوئی یقینی ضمانت نہیں۔ اس لیے ان فنڈز کے لیے شفاف سرمایہ کاری پالیسی، آزادانہ نگرانی، پیشہ ورانہ انتظام اور باقاعدہ آڈٹ ناگزیر ہوں گے۔ بنیادی سرمائے کا تحفظ اور حاصل ہونے والی آمدن کا درست استعمال ہی اس منصوبے کی کامیابی کا اصل معیار ہوگا۔
یہاں ایک اور اہم پہلو بھی قابلِ غور ہے۔ صوبائی حکومت نے صرف مالی امداد کا مطالبہ نہیں کیا بلکہ جامعات کے مالیاتی نظم و نسق میں اصلاحات کی تجاویز بھی پیش کی ہیں۔ ان کے مطابق گرانٹس طلبہ کی تعداد کے تناسب سے دی جائیں، جہاں ہر استاد کے مقابلے میں دو سے زیادہ انتظامی ملازمین ہوں وہاں مزید غیرتدریسی بھرتیاں نہ کی جائیں اور فیسوں سے حاصل ہونے والی آمدن کے بجٹ میں گزشتہ سال کے مقابلے میں دس فیصد سے زیادہ اضافہ نہ کیا جائے۔ اس کے علاوہ مالی امداد کے استعمال کا سالانہ آڈٹ بھی تجویز کیا گیا ہے۔
یہ تجاویز اس لیے اہم ہیں کہ کسی بھی ادارے کا مالی بحران صرف مزید رقم فراہم کرکے مستقل طور پر ختم نہیں کیا جا سکتا۔ اگر اخراجات کی ترجیحات درست نہ ہوں، انتظامی ڈھانچہ ضرورت سے زیادہ پھیل جائے، غیرضروری بھرتیاں جاری رہیں اور مالی منصوبہ بندی میں احتساب موجود نہ ہو تو نئی گرانٹس بھی چند سال بعد ناکافی ثابت ہوں گی۔ جامعات کو مالی امداد کے ساتھ اپنے انتظامی اور مالیاتی نظام کی اصلاح بھی کرنا ہوگی۔
اس معاملے میں ہائر ایجوکیشن کمیشن کا 12 نومبر کا خط ایک اہم پیش رفت ہے۔ ایچ ای سی نے صوبائی حکومت کی درخواست کو وفاقی وزارتِ تعلیم کے سامنے پیش کرتے ہوئے سفارش کی ہے کہ 18 ارب روپے کے مجوزہ پیکیج کو وزارتِ خزانہ کے ساتھ اٹھایا جائے تاکہ اس پر غور اور مناسب مالی معاونت کی جا سکے۔ ایچ ای سی نے یہ بھی بتایا ہے کہ مالی سال 2026-27ء کے لیے خیبرپختونخوا کی سرکاری جامعات کو 8.174 ارب روپے کی وفاقی گرانٹ مختص کی گئی ہے، جبکہ صوبائی حکومت کی جانب سے مالی معاونت 11.85 ارب روپے بتائی گئی ہے۔
یہاں یہ وضاحت ضروری ہے کہ ایچ ای سی کا خط 18 ارب روپے کی منظوری یا اجرا کا اعلان نہیں بلکہ وفاقی حکومت سے اس تجویز پر غور اور مالی معاونت کی درخواست ہے۔ لہٰذا اس مرحلے پر اسے منظور شدہ پیکیج قرار دینا درست نہیں ہوگا۔
خیبرپختونخوا کی خصوصی جغرافیائی اور سکیورٹی صورت حال بھی اس بحث سے الگ نہیں کی جا سکتی۔ صوبائی حکومت نے اپنے خط میں دہشت گردی کے خلاف جنگ میں صوبے کے فرنٹ لائن کردار اور اس کے وسائل پر پڑنے والے غیرمعمولی دباؤ کا حوالہ دیا ہے۔ بدامنی اور عدم تحفظ نہ صرف طلبہ اور اساتذہ کی تعلیمی سرگرمیوں کو متاثر کرتے ہیں بلکہ جامعات کے لیے نئے طلبہ اور اہل تدریسی عملے کو راغب کرنا بھی مشکل بنا سکتے ہیں۔ ایسے حالات میں وفاقی حکومت کی مالی معاونت کو محض ایک صوبائی مطالبہ نہیں بلکہ قومی تعلیمی ذمہ داری کے تناظر میں بھی دیکھنے کی ضرورت ہے۔
لیکن اس کے ساتھ ایک بنیادی سوال یہ بھی ہے کہ کیا صوبائی حکومت اپنی جامعات کے مالی بحران کی مکمل ذمہ داری قبول کرنے اور ان کے انتظامی معاملات کا غیرجانبدارانہ احتساب کرنے کے لیے تیار ہے؟ کیا ہر جامعہ کی آمدن، اخراجات، ملازمین، پنشن، ترقیاتی بجٹ اور مالی واجبات کی تفصیلی جانچ ہوگی؟ کیا ان جامعات کے سربراہان سے بھی پوچھا جائے گا کہ دستیاب وسائل کے باوجود بعض ادارے اس قدر بڑے خساروں تک کیسے پہنچے؟
وفاقی حکومت سے مالی معاونت طلب کرنا ایک جائز انتظامی قدم ہو سکتا ہے، لیکن صوبائی حکومت کو اپنی مالی ترجیحات، جامعات کی نگرانی اور ادارہ جاتی اصلاحات کی ذمہ داری سے بری الذمہ نہیں کیا جا سکتا۔ اسی طرح وفاقی حکومت کو بھی اعلیٰ تعلیم کے معاملے کو محض صوبائی بجٹ کا مسئلہ سمجھ کر نظرانداز نہیں کرنا چاہیے۔
خیبرپختونخوا کی سرکاری جامعات محض تعلیمی عمارتیں نہیں بلکہ وہ ادارے ہیں جہاں سے مستقبل کے ڈاکٹر، انجینئر، اساتذہ، محققین، منتظمین اور مختلف شعبوں کے ماہرین تیار ہوتے ہیں۔ ان اداروں کی کمزوری کا مطلب صوبے کی علمی، سائنسی اور معاشی صلاحیت کو محدود کرنا ہے۔ آج اگر مالی مشکلات کے باعث تحقیق، تعلیمی معیار، وظائف اور بنیادی سہولیات متاثر ہوتی ہیں تو اس کے نتائج آنے والی کئی نسلوں کو بھگتنا پڑ سکتے ہیں۔
18 ارب روپے کا مطالبہ اس بحران سے نکلنے کی ایک کوشش ضرور ہے، لیکن اصل کامیابی اس وقت ہوگی جب جامعات کو مستقل مالی بنیاد فراہم ہو، طلبہ پر فیسوں کا بوجھ کم ہو، انتظامی اخراجات قابو میں آئیں، تحقیق کو فروغ ملے اور ہر سطح پر مالی شفافیت یقینی بنائی جائے۔
ریاست کی ذمہ داری صرف یہ نہیں کہ بحران پیدا ہونے کے بعد امدادی رقم فراہم کرے، بلکہ یہ بھی ہے کہ ایسا نظام قائم کرے جس میں تعلیمی ادارے بار بار مالی بحران کا شکار نہ ہوں۔ علم پر سرمایہ کاری کسی حکومت کا احسان نہیں بلکہ ایک بنیادی قومی ضرورت ہے۔
جامعات کے چراغ بجھنے سے صرف تعلیمی ادارے تاریک نہیں ہوتے، قوموں کے مستقبل کی راہیں بھی دھندلا جاتی ہیں۔
واپس کریں