لاہور(نامہ نگار خصوصی)کشمیر سنٹر لاہور کے زیراہتمام شہدائے جموں کو خراج عقیدت پیش کرنے کے لیے خصوصی تقریب کا انعقاد کیا گیا۔ تقریب سے سابق وزیر حکومت ناصر حسین ڈار،ممتاز کشمیری رہنما سابق مشیر صدر ریاست سید نصیب اللہ گردیزی، رہنما کل جماعتی حریت کانفرنس انجینئر مشتاق محمود، سابق رکن اسلامی نظریاتی کونسل مولانا شفیع جوش، مرکزی جوائنٹ سیکرٹری پی ٹی آئی آزادکشمیر مرزا صادق جرال، انچارج کشمیرسنٹرلاہور انعام الحسن،مرکزی جوائنٹ سیکرٹری مسلم لیگ ن آزادکشمیر مقبول اعوان، سیکرٹری جنرل کشمیر ایکشن کمیٹی فاروق آزاد، سیکرٹری جنرل مسلم لیگ ن آزادکشمیر لاہور ڈویژن بلال بٹ، چوہدری محمد صدیق، علامہ مشتاق قادری، قاضی انوار، علامہ خالد محمود، پروفیسر مظہر عالم، معروف دانشور نذر بھنڈر، نوید ملک، حاجی اعجاز سابق کونسلر نے خطاب کیا۔ تقریب میں ادارہ تعلیمات مجددیہ کے طلباء نے شہداء کی بلندی درجات کے لیے قرآن خوانی بھی کی۔
مقررین نے تقریب سے خطاب کرتے ہوئے کہا کہ یومِ شہدائے جموں منانے کا مقصدان اڑھائی لاکھ شہداء کو یاد کرنا اور انھیں خراج عقیدت پیش کرنا ہے جنھوں نے پاکستان کی جانب ہجرت کرتے ہوئے جام شہادت نوش کیا۔ یہ پاکستان کی محبت میں قربانی کی سب سے بڑی مثال ہے جو جموں کے مسلمانوں نے پیش کی۔ ان شہداء نے اپنی جانیں اس پکے یقین اور محبت کے لیے دیں کہ ان کی آخری منزل پاکستان تھی۔مقررین نے مزید کہا کہ مقبوضہ کشمیر کی عوام صدی سے زائد عرصے سے بھارتی غاصبانہ قبضے کے خلاف ڈٹ کر کھڑی ہے اور اپنی آزادی کی خاطر مسلسل قربانی دے رہی ہے۔جانیں، املاک اور عزتیں سب اس راہ میں قربان ہو رہی ہیں۔ پاکستان ہر صورت کشمیری عوام کے ساتھ کھڑا رہے گا اور ان کی حمایت سے کبھی پیچھے نہیں ہٹے گا۔ کشمیر ہمارے لیے شہہ رگ کی حیثیت رکھتا ہے اور کوئی قوم اپنی شہ رگ دشمن کے حوالے نہیں کر سکتی۔انہوں نے کہا کہ ہمیں پوری طرح احساس ہے کہ کشمیری عوام پاکستان سے محبت کی وجہ سے بھارتی ظلم و ستم برداشت کر رہے ہیں، مگر ان شاء اللہ بہت جلد یہ ظلم و جبر کی تاریکی ختم ہوگی اور آزادی کا ایک نیا سورج طلوع ہوگا۔ پاکستان کے ہر طبقے کا ہر فرد کشمیری عوام کی جدوجہدِ آزادی کا مضبوط حامی ہے۔مقررین نے کہاکہ جب قابض علاقے میں کوئی شہید ہوتا ہے تو اہلِ کشمیر اسے پاکستانی قومی پرچم میں لپیٹ کر سپردِ خاک کرتے ہیں۔دنیا کو یہ جان لینا چاہیے کہ یہ ان کا پاکستان کی محبت کے ساتھ سب سے بڑا ثبوت ہے۔ ان کا کہنا تھا کہ بھارتی تسلط کو برقرار رکھنے کی کوششیں اور جبر کشمیری مزاحمت کو مزید تقویت دے رہے ہیں اور ہندوتوا کی نظریاتی قوتیں خطے میں بڑھتی ہوئی کشیدگی کا باعث بن رہی ہیں۔آخر میں مقررین نے کہا کہ پاکستان نے ماضی میں بھی کشمیری تحریکِ آزادی کا بھرپور ساتھ دیا ہے اور آئندہ بھی دے گا۔قوم اپنے شہداء کو جذبہ احترام کے ساتھ یاد رکھے گی اور ان کے نصب العین کو زندہ رکھنے میں کوئی کسر نہیں چھوڑے گی۔ عوام سے اپیل کی گئی کہ وہ یومِ شہدائے جموں میں شہداء کی یاد کو عقیدت و احترام سے منائیں اور اس عزم کا اعادہ کریں کہ کشمیری بھائیوں کی حمایت ہر حال میں جاری رہے گی۔
واپس کریں