دل بعض و حسد سے رنجور نہ کر
یہ نور خدا ہے اس سے بے نور نہ کر
ہمارے قومی وسائل جتنے بڑے پیمانے پر کرپشن کی بھینٹ چڑھ رہے ہیں اس کی ایک نہایت ہولناک مثال خیبر پختونخوا کے سرکاری بینک کھاتوں میں 40ارب روپے سے زائد کی مالی بدعنوانی کے انکشاف کی شکل میں سامنے آئی ہے ۔ذرائع کے مطابق نیب کے چیئرمین کو اَپر کوہستان میں بڑی مالی بے ضابطگیوں سے متعلق مصدقہ معلومات موصول ہوئیں جس کے بعد تحقیقات کا آغاز کیا گیا۔ ضلع کا سالانہ ترقیاتی بجٹ صرف ڈیڑھ ارب روپے تک ہوتا ہے لیکن گزشتہ پانچ برسوں میں 40 ارب روپے حکومتی بینک کھاتوں سے جعلی طورپر نکلوائے گئے ۔ صوبائی حکومت کے سیکورٹی اینڈ ڈپازٹ ورکس کا بینک کھاتہ جو ترقیاتی منصوبوں کی ادائیگیوں کیلئے مخصوص ہے، اسے بڑھا چڑھا کر بنائے گئے بلوں اور فرضی سیکورٹیز کے ذریعے استعمال کیا گیا۔ سرکاری بینک کے داسو اپر کوہستان برانچ کے کچھ ملازمین نے سرکاری فنڈ نجی کھاتوں میں منتقل کیے حتیٰ کہ ایک ڈمپر ڈرائیور کے اکاؤنٹ میں چار ارب روپے سے زیادہ کی رقم پائی گئی۔ تشویشناک امر یہ ہے کہ آڈٹ اور اکاؤنٹس کے محکمے بھی اس دھوکا دہی کو نہ تو روک سکے نہ وقت پر اس کا پتا چلا سکے جس سے احتسابی نظام پر سنجیدہ سوالات اٹھ کھڑے ہوئے ہیں۔ مالیاتی اسکینڈلز کے ہر دور میں سامنے آنے کے باوجود اس سلسلے کے جاری رہنے کی سب سے بڑی وجہ یہ ہے کہ اسکینڈلز کی تحقیقات بالعموم کسی حتمی نتیجے تک نہیں پہنچتیں ، کیس طول پکڑتا چلا جاتا ہے اور پھر معاملہ کسی نہ کسی طرح رفع دفع ہوجاتا ہے یا عدالتوں میں الزامات ثابت نہیں ہوتے۔ تاہم ملکی تاریخ کے اتنے بڑے اسکینڈل کو اس انجام سے دوچار نہیں ہونا چاہیے بلکہ اسے ایک ٹسٹ کیس بناکر نیب کو قومی سطح پر اپنی افادیت ثابت کرنی چاہیے کیونکہ جن دستاویزی ثبوت و شواہد کی موجودگی کا دعویٰ کیا گیا ہے بظاہر وہ بہت مضبوط ہیں اور اس کے بعد بھی الزامات ثابت نہ کیے جاسکے تو احتسابی عمل پر قوم کا اعتبار مزید کمزور ہوگا۔